टस हारेर मलेसियाविरुद्ध पहिले बलिङ गर्दै नेपाल

त्रिकोणात्मक ट्वान्टी–२० शृंखलामा मलेसियासँग टस हारेर नेपालले पहिले बलिङ सुरु गरेको छ । नेपालका प्रशिक्षक पुबुदु दासानायकेले आफूले नयाँ खेलाडी प्रयोग गर्न चाहेको बताउँदै आएबमोजिम नै बुधबार टोलीमा फिर्ता बोलाइएका विकेटकिपर–ब्याटर दिलीप नाथलाई मौका दिइएको छ ।

दुवै टोलीको प्रतियोगितामा यो दोस्रो खेल हो । पहिलो खेलमा दुवैले पपुवा न्यु गिनी (पीएनजी) विरुद्ध विजय हात पारेको थियो । नेपालले पहिलो खेलमा पीएनजीलाई १५ रनले पराजित गरेको थियो । मलेसियाले पीएनजीमाथि ८ रनको ऐतिहासिक विजय हात पारेको थियो ।

नेपालले पीएनजीविरुद्ध सोमबार खेलेको टोलीबाट लोकेश बमको स्थानमा दीलिप नाथलाई खेलाएको छ । दीलिपको ट्वान्टी २० अन्तर्राष्ट्रियमा यो ‘डेब्यु’ खेल हो । उनले विकेटकिपङका साथै ब्याटरको रुपमा टोलीमा रहने छन् । आसिफ शेख ब्याटरको रुपमा मात्रै रहने छन् ।

मलेसिया माथि विजय हात पारेमा नेपालको फाइनल प्रवेश सम्भावना बलियो हुनेछ । नेपालले मलेसियाविरुद्धको पछिल्ला ४ खेलमा ३ मा विजय हात पारेको छ । गत वर्ष नेपालमै भएको त्रिकोणात्मक ट्वान्टी २० शृंखलामा नेपालले मलेसियासँग राउन्ड रोबिनको दुवै खेल जितेको थियो ।

तर २०२२ को मार्चमा थाइल्यान्डमा भएको एसीसी ट्वान्टी २० छनोटमा मलेसियाले नेपाललाई २२ रनले पराजित गरेको थियो । सरभिन मुनिआउन्डीले ४ विकेट लिदैं प्लेयर अफ द म्याच बनेका थिए । उनले नै मंगलबार पीएनजीविरुद्ध ४ विकेट लिँदै प्लेयर अफ द म्याच प्रदर्शन गरेका थिए ।

यस्तो छ मलेसियाविरुद्ध खेल्ने नेपाली टोली