काठमाडौँ — सन्दीप लामिछानेको कप्तानीमा नेपाल पहिलोपटक मैदानमा उत्रिएको छ । ओमानको राजधानी मस्कटमा शुक्रबार सुरु चारदेशीय ट्वान्टी–२० शृंखलाका लागि घरेलु टोलीविरूद्धको खेलमा टस गर्न गएसँगै सन्दीपको नेपालबाट कप्तानी इनिङ्स सुरु भएको हो । केन्द्रीय सम्झौतालाई लिएर नेपाल क्रिकेट संघ (क्यान) सँग विवादमा आएपछि नेपाली क्रिकेटको सर्वोच्च निकायले मंसिर २९ गते कप्तान ज्ञानेन्द्र मल्ललाई पदमुक्त गर्दै सन्दीपलाई नेतृत्व दिने घोषणा गरेको थियो । त्यसयता नेपाल पहिलोपटक अन्तर्राष्ट्रिय खेलका लागि मैदानमा उत्रिन लागेको हो ।
आफ्ना प्रतिद्वन्द्वी समकक्षी ओमानका जेसन मक्सदुसँगै अल एमेरेट रंगशालामा टसका लागि गएपछि सन्दीप नेपालका कप्तान बनेका हुन् । २१ वर्षे सन्दीप नेपालका दोस्रो कान्छा कप्तान हुन् । सन् २००९ मा युएईमा भएको एसीसी ट्वान्टी–२० एलिट कपमा पहिलोपटक कप्तानी गर्दा पारस खड्का २० वर्षका थिए ।
पारसकै कप्तानीमा सन्दीपले काठमाडौंमा नामिबियासँग विश्व क्रिकेट लिग च्याम्पियनसिपको खेलबाट ‘डेब्यु’ गरेका थिए । लेग स्पिनबाट ठूलो प्रभाव पार्दै आएका सन्दीप नेपालबाट ट्वान्टी–२० अन्तर्राष्ट्रियमा सर्वाधिक विकेट लिने खेलाडी हुन् । उनले २५ खेलमा सर्वाधिक ४७ विकेट लिएका छन् । ट्वान्टी–२० अन्तर्राष्ट्रियमा उनले आफ्नो ‘डेब्यु’ आईसीसी विश्व ११ बाट खेल्दै वेस्ट इन्डिजविरूद्ध लर्डस् मैदानमा २०१८ मा गरेका थिए ।
एकदिवसीय अन्तर्राष्ट्रियमा पनि सन्दीप नेपालबाट सर्वाधिक विकेट लिने खेलाडी हुन् । उनले १६ खेलमा ४१ विकेट लिइसकेका छन् । एकदिवसीय अन्तर्राष्ट्रियमा उत्कृष्ट बलिङ सन्दीपकै नाममा छ । सेप्टेम्बरमा मस्कटमै सन्दीपले पपुवा न्यु गिनीविरूद्ध ११ रन खर्चेर ६ विकेट लिएका थिए ।
व्यक्तिगत उत्कृष्ट प्रदर्शन गर्दै आए पनि सन्दीपले नेतृत्वको हिसाबमा ठूलो चुनौतीको सामना गर्दैछन् । यसअघि नेपालको यू–१९ कप्तान रहेका सन्दीपले घरेलु राष्ट्रिय र फ्रेन्चाइज प्रतियोगितामा कप्तानी गरिसकेका छन् । ती प्रतियोगितामा उनले कुनै सफलता हात पारेका छैनन् । सन्दीपले २०१८ मा पोखरा प्रिमियर लिगमा उनले विराटनगर टाइटन्स र असोजमा उनले एभरेष्ट प्रिमियर लिगमा काठमाडौं किंग्स इलेभेनको कप्तानी गरेका थिए ।
‘निश्चय पनि कप्तानी मेरा लागि नयाँ अनुभव हुनेछ, तर एक अर्कामा हामी सबैसँगै खेलिरहेकाले मलाई कप्तानी खासै नौलो हुनेछैन्,’ सन्दीप नयाँ जिम्मेवारीका बारेमा ओमान जानुअघि भनेका थिए ।
२०१५ मा प्रशिक्षक पुबुदु दासानायके चितवन जानेक्रममा क्याम्पा चौर मैदानमा सन्दीपलाई पहिलोपटक देखेका थिए । चितवन जिल्ला क्रिकेट संघको एकेडेमीमा प्रशिक्षण गरिरहेका सन्दीप त्यसपछि नेपाली क्रिकेट संरचनामा आएका थिए र त्यसको ६ महिनापछि नेपाली राष्ट्रिय टोलीमा ‘डेब्यु’ गरेका थिए ।
त्यसयता उनी एसोसिएट क्रिकेटकै प्रभावशाली खेलाडी बन्दै आएका छन् । २०१८ मा उनलाई इन्डियन प्रिमियर लिग (आईपीएल) को तत्कालीन फ्रेन्चाइज टोली दिल्ली डेयरडेभिल्स (दिल्ली क्यापिटल्स) ले २० लाख भारु भाउ हाल्दै लिएको थियो । सन्दीप आईपीएल खेल्ने पहिलो नेपाली खेलाडी हुन् ।
त्यसयता उनले बिग बास, क्यारेबियन प्रिमियर लिग, पाकिस्तान सुपर लिग, अफगानिस्तान प्रिमियर लिग, ढाका प्रिमियर लिग, टी–१० लिग, ग्लोबल लिग क्यानाडा खेल्दै आएका छन् ।
