सूचना तथा सञ्चारमन्त्री सुरेन्द्रकुमार कार्की स्पेनको बार्सिलोनामा भएको ‘जिएसएमए मोबाइल वल्र्ड कँग्रेस’ मा भाग लिई आज स्वदेश फर्कनु भएको छ ।
यही फागुन १६ देखि १८ गतेसम्म भएको सम्मेलनमा भाग लिई आज स्वदेश फर्कने क्रममा त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै मन्त्री कार्कीले बार्सिलोनामा भएको मन्त्रिस्तरीय सो सम्मेलनमा विश्वका नयाँ प्रविधि र सञ्चारका बारेमा जानकारी हासिल हुनाका साथै द्विपक्षीय र बहुपक्षीय हितका बारेमा उपलब्धिमूलक छलफल भएको बताउनुभयो ।
सम्मेलनमा विश्वका प्रख्यात सूचना प्रविधिसम्बन्धी कम्पनीका प्रतिनिधिसँग नेपालको सूचना तथा सञ्चार प्रविधिका बारेमा छलफल हुनाका साथै नेपालमा लगानी गर्ने सम्बन्धमा पनि वार्ता भएको थियो । “समग्रमा नेपालको विकास प्रक्रियासँग सूचना र सञ्चार प्रविधिलाई जोडेर लैजानेबारेमा सम्मेलन उपलब्धिमूलक रह्यो”, मन्त्री कार्कीले भन्नुभयो ।
सम्मेलन सकिएपछि मन्त्री कार्की क्युबा सरकार र त्यहाँको कम्युनिस्ट पार्टीको निमन्त्रणामा क्युबा प्रस्थान गर्नुभएको थियो । क्युवाको हवानामा त्यहाँका सञ्चारमन्त्री, विदेशमन्त्री, पार्टीका पदाधिकारीलगायतसँग आफ्नो उच्चस्तरीय भेटघाट भएको जानकारी उहाँले दिनुभयो ।
मन्त्री कार्कीले क्युबामा शिक्षा र स्वास्थ्यका क्षेत्रमा भएको अभूतपूर्व प्रगतिको प्रशंसा गर्दै नेपाली विद्यार्थीलाई समेत अध्ययनका लागि पठाउन सकिनेबारेमा वार्तालाप भएको बताउनुुभयो ।
सञ्चारमन्त्रीले संयुक्त राज्य अमेरिकामा इन्टरनेसनल टेलिकम्युनिकेसन स्याटलाइट अर्गनाइजेसनका निर्देशकसँग नेपालको सूचना प्रविधिको विकास सम्बन्धमा कुराकानी गर्नुभयो । सो वार्तालापमा उक्त संस्थाले नेपालका प्राविधिकलाई स्याटलाइट सम्बन्धमा निःशुल्क तालिम दिने प्रतिबद्धता व्यक्त गरेको थियो ।
मन्त्री कार्कीका साथमा सञ्चार सचिव महेन्द्रबहादुर गुरुङलगायत नेपाल टेलिकमका प्राविधिकको समेत सहभागिता थियो । रासस
