भारतको प्रमुख अन्तराष्ट्रिय एयरलाइन्स जेट एयरवेजले आ.व. २०१६–१७ को तेस्रो त्रैमासिक अवधिमा भारु १५६.३ करोड मुनाफा आर्जन गरेको छ । यस अवधिमा कूल आयमा १.४ प्रतिशतले बृद्धि भई भारु ५७८४ करोड पुगेको छ ।
जेट एयरवेज समूहले हालै गरेको घोषणामा यात्रु संख्या ४.१ प्रतिशतले बढेर ६७.९ करोड पुगेको बताएको छ । जेट एयरवेजले लगातार मुनाफा आर्जन गरेको यो सातौं त्रैमासिक हो ।
एयरवेजले यस त्रैमासिकमा ऋण रकम भारु १००१ करोडले घटाउन सफल भएको पनि जानकारी दिएको छ । यस अघिको नौ महीनाको अवधिमा ऋण रकम भारु १४३५ करोडले कम भएको थियो ।
बेंगलुरु, चेन्नाई, मुम्बई, एम्स्टर्डम, जेद्दा, कुबेत लगायतका आन्तरिक तथा अन्तराष्ट्रिय क्षेत्रको बढदो माग अनुरुप आफ्नो हवाई क्षमताको अधिकतम उपयोग गरेको जेट एयरवेजले बताएको छ । यसका लागि वाइड बडी एयर क्राफ्टको उडान संख्यामा बृद्धि गरिएको छ ।
गुणस्तरमा उत्कृष्टताका साथै विश्वका अग्रणी एयरलाइन्सहरुसँगको आवद्धता तथा सहकार्यले गर्दा जेट एयरवेजले आफ्नो यात्रु संख्यामा उल्लेखनीय बृद्धि गर्न सफल भएको हो । यात्रुवर्गको सुविधामा अधिकतम ध्यान पुर्याई यात्रालाई अझ बढी सुखद बनाउन निरन्तर प्रयत्नरत रहेको जानकारी एयरवेजले दिएको छ ।
