रूपन्देही जिल्ला अदालतका न्यायाधीश वशिष्टकुमार घिमिरेको इजलासले माघ २८ गते जोशीलाई तत्काल प्राप्त प्रमाणका आधारमा निर्दोष भन्न नमिल्ने भन्दै पुर्पक्षका लागि कारागार पठाएको थियो । त्यसलगत्तै उनले माघ ३० गते नै उच्च अदालत बुटवल इजलासमा जिल्ला अदालतको आदेश बदरको माग गर्दै निवेदन दर्ता गराएका थिए ।

गत शुक्रबार उच्च अदालतले पनि थुनामै राख्ने आदेश सदर गरेको थियो । उच्चले शुक्रबार जोशीको हकमा जिल्ला आदेश सदर गर्दै अर्का प्रतिवादी रवि लामिछानेलाई पनि थुनामै राख्ने आदेश दिएको थियो । उच्च अदालतको आदेशपछि लामिछाने पनि सोही कारागारको ब्लक नं. ४ मा रहेका छन् । जोशी ब्लक नं. २ मा छन् ।

पहिलादेखि नै उच्च रक्तचापको समस्या रहे पनि अहिले जोशीमा थप स्वास्थ्य समस्या देखिएको कारागार प्रमुख सुरेश भण्डारीले बताए । ‘उहाँको स्वास्थ्यमा समस्या देखिएपछि हिजोदेखि युनिभर्सल कलेज अफ मेडिकल साइन्स (यूसिएमएस) भर्ना गरेका छौं,’ उनले भने, ‘अझै केही दिन डाक्टरको निगरानीमै राख्छौं ।’ जोशी र उनको परिवार उच्च अदालतबाट थुनामुक्त हुनेमा धेरै आशावादी थिए । तर, त्यही अनुसार आदेश नआएपछि उनी बिरामी परेको पारिवारिक स्रोतले बतायो ।

भैरहवास्थित युनिभर्सल मेडिकल कलेजमा जोशीलाई प्राध्यापक एवं डा. सन्दीप सुवेदीसहितको टोलीले हेरिरहेको छ । डा. सुवेदी साइकाट्रिक कन्सल्ट्यान्ट हुन् ।

जोशीको उच्च रक्तचाप र शरीरमा चिडचिडाहट पुन बढिरहेको र अन्य परीक्षणहरू भइरहेको अस्पतालका सूचना अधिकारी सुशील गुरुङले बताए । ‘उहाँलाई अझै ३/४ दिन डाक्टरको निगरानीमै राख्नुपर्ने देखिन्छ,’ उनले भने, ‘अन्य परीक्षणका सबै रिपोर्टहरु आएपछि मात्र थप विषयमा भन्न सकिन्छ ।’

जोशी कारागार प्रशासनको निगरानीमा अस्पतालको क्याबिनमा रहेको सूचना अधिकारी गुरुङले बताए । सुप्रिम सहकारी ठगी प्रकरण मुद्दामा जोशीविरुद्ध २ करोड ५० लाख व्यक्तिगत र १० करोड ९९ लाख ३६ हजार रुपैयाँ संयुक्त बिगो दाबी गरिएको छ ।