पूर्वराजा शाहले चैत १४ मा दुर्गा प्रसाईंलाई निर्मल निवासमा डाकेको र त्यसपछि हिंस्रक घटनाहरू भएको प्रधानमन्त्री ओलीले बताए । ‘समाज बिथोल्न लागिपरेका एक जना अवाञ्छित व्यक्तिलाई आफ्नै निवासमा डाकेर कथित जनकमान्डर तोक्नुभयो र हिंसात्मक वारदातका लागि खटाउनुभयो,’ उनले भने, ‘प्रारम्भिक अध्ययनमा यी सबै घटनाले स्पष्ट पार्छ । पूर्वराजा शाहले संविधानसभाको ऐतिहासिक निर्णयपछि भएको सम्झौता उल्लंघन गर्नुभएको छ ।’

त्यही दिन विपक्षी दलहरूको समाजवादी मोर्चाले काठमाडौंको भृकुटीमण्डपमा गरेको भव्य सभा शालीन भएको भन्दै प्रधानमन्त्रीले धन्यवादसमेत दिए । प्रधानमन्त्री ओलीले राप्रपाका सांसदहरूको पनि आलोचना गरेका छन् । संसदभित्र गणतान्त्रिक प्रणाली र संघीय लोकतन्त्रको विरोध गर्ने कुरा स्विकार्य विषय नभएको उनको भनाइ थियो । प्रधानमन्त्रीले प्रतिनिधिसभामा बोल्दै गर्दा तीनकुने घटनाका सन्दर्भमा पूर्वराजा शाह जिम्मेवार रहेको भनेपछि राप्रपाका सांसदहरूले विरोध जनाएका थिए । त्यसपछि राष्ट्रिय सभामा बोल्न आएका ओली राप्रपा सांसदप्रति खनिएका थिए ।

प्रधानमन्त्री ओलीले बैठकमा एउटा कर्मचारीलाई हटाइएको र उक्त विषय अदालतमा विचाराधीन रहेकाले संसद्मा छलफल गर्न नमिल्ने जवाफ दिएका थिए । राष्ट्रसेवक कर्मचारीको गुण/दोष टिप्पणी गर्ने स्थल संसद् नभएको उनको भनाइ थियो । विद्युत् प्राधिकरणका कार्यकारी निर्देशकबाट कुलमान घिसिङलाई हटाइएको विषयमा संसद्मा जवाफ दिनुपर्ने बाध्यकारी स्थिति बनेपछि प्रधानमन्त्री ओलीले संसद्प्रति असन्तुष्टि व्यक्त गरेका छन् ।

व्यक्ति–व्यक्तिको नियुक्ति वा कारबाहीका विषयमा संसद्ले हात हाल्यो भने संसद्ले आफ्नो मुख्य काम गर्न नपाउने उनको भनाइ थियो । उनले लोक सेवाबाट नियुक्ति हुनेबाहेक अन्य प्रक्रियाबाट सरकारले गर्ने नियुक्ति सरकार फेरिँदा स्वतः पदमुक्त विधि अपनाएर जान सकिने सुझाए । माओवादी प्रवक्ता अग्नि सापकोटाले घिसिङका विषयमा प्रधानमन्त्रीले जवाफ दिएपछि अवरोध हटाएको बताए ।

कांग्रेस सांसद विश्वप्रकाश शर्माले तीनकुने घटनाबारे निर्मल निवासको मौनताप्रति प्रश्न उठाएका छन् । सोमबार प्रतिनिधिसभामा बोल्दै उनले तीनकुनेमा हिंसात्मक गतिविधि हुँदै गर्दा सबैलाई दुखेको तर निर्मल निवासलाई नदुखेको उल्लेख गरे । ‘सविन महर्जन नाम गरेका एक जना श्रमजीवी युवा, सुरेश रजक नाम गरेका एक श्रमजीवी पत्रकारको दुःखद निधनमा सबैले दुःख व्यक्त गरेका छन् । सबै दलको वक्तव्य आएको छ,’ पूर्वराजा शाहलाई लक्षित गर्दै उनले भने, ‘राजा चाहिएको छ भन्ने युवकलाई प्रश्न गर्न चाहन्छु, तीनकुने घटनाले तपाईंको हृदय दुख्दै गर्दा, हृदय नदुख्ने कस्तो राजा परिकल्पना गर्नुभएको छ, कस्तो राजा चाहनुभएको छ ।’ उनले समाजमा देखिएका असन्तुष्टिको हल राजा नभएको बताए । ‘मल नपाएको एउटा किसानलाई मल चाहियो कि राजा ? भनेर सोध्दा उसले भन्छ– मल । बाटो बन्न ढिलाइ भएर बसेको असन्तुष्ट नागरिकलाई गएर सोधौं– तिमीलाई बाटो चाहिएको हो कि राजा ? उसले भन्छ– बाटो,’ शर्माले भने, ‘चढिरहेको मोटर बिग्रियो भने मोटर मर्मत गर्ने कि गोरुगाडा खोजीतर्फ लाग्ने ?’

एमाले सांसद योगेशकुमार भट्टराईले छिनोफानो भइसकेको इतिहासलाई फेरि फर्काउन खोजेर बचेको साख पनि नसकाउन पूर्वराजालाई सुझाए । उनले जनताले फालिसकेको राजतन्त्र अब फर्किने सम्भावना नरहेकाले देशमा अराजक गतिविधि नगराउन चेतावनी दिए ।

माओवादी सांसद रेखा शर्माले राजावादीद्वारा तीनकुनेमा अराजकताको पराकाष्ठा देखाइएको बताइन् । त्यस घटनामा पूर्वराजा शाहको हात रहेको उनको भनाइ छ । ‘काठमाडौंको संवेदनशील ठाउँ तीनकुनेमा कार्यक्रम गर्ने अनुमति दिँदै गर्दा सरकारले आवश्यक तयारी गर्न सकेन,’ उनले भनिन्, ‘प्रदर्शनकारीबाट त्यहाँ जसरी घटनाहरू गराइए, त्यो निन्दनीय छ । त्यो घटनाका पछाडि कसको हात छ, त्यो दिनको घाम जति नै छर्लङ्ग छ । पर्दा पछाडि पूर्वराजा ज्ञानेन्द्र शाह छन् । उनको उक्साहटमा घटना गराइएको छ ।’

संविधान र कानुनमाथि कोही नरहेकाले पूर्वराजा शाह वा जो कोही भए पनि कानुनी कारबाही गर्नुपर्ने उनले सरकारसँग माग गरिन् । उनले सुशासन कायम गर्न नसक्दा विरोधका स्वरहरू उठेको बताए । विद्युत् प्राधिकरणका कार्यकारी निर्देशक घिसिङलाई हटाएको सन्दर्भमा प्रधानमन्त्रीले दिएको जवाफ चित्तबुझ्दो नभएको भन्दै उनले खेदसमेत व्यक्त गरिन् ।