दुबईका लागि उडेको नेपाल एयरलाइन्सको जहाज भैरहवामा ग्राउन्डेड
नेपाल वायुसेवा निगमको सगरमाथा न्यरोबडी विमान, जुन दुबईका लागि १४९ यात्रु लिएर बुधबार राति उडेको थियो, प्राविधिक समस्या आएपछि भैरहवामा ग्राउन्डेड भएको छ।
यो जहाज ६ दिनअघि चीनबाट ६ करोड ६८ लाख रुपैयाँ खर्चेर फाइभ–सि–चेक (मर्मत) पछि उडानमा ल्याइएको थियो। त्रिभुवन अन्तर्राष्ट्रिय विमानस्थलबाट राति १०:३० बजे उडेर भैरहवा हुँदै दुबई जाने तालिका थियो। तर, भैरहवामा राति ११:१५ बजे अवतरण गरेपछि इन्जिनमा ओभर स्पिड प्रोटेक्सन समस्या देखिएपछि राति १ बजे ग्राउन्डेड गरिएको हो।
भैरहवामा निगमका सीमित कर्मचारी रहेकाले राति अन्य कर्मचारी बोलाइ यात्रुहरूलाई बिहान ४ बजेसम्म होटलमा व्यवस्थित गरिएको थियो। निगमका अनुसार जहाज काठमाडौंबाट उड्नु अघि नै फ्युल मिटर बदल्नुपर्दा करिब २ घन्टा ढिलो भएको थियो।
हाल काठमाडौंबाट इन्जिनियर पठाएर मर्मत गरी जहाजलाई आजै दुबई पठाउने तयारी भइरहेको निगमले जनाएको छ।
