माध्यमिक शिक्षा परीक्षा (एसइई) मा सबैभन्दा बढी जीपीए ल्याउने विद्यार्थीको संख्या नौ हजार ६३३ रहेको छ ।
राष्ट्रिय परीक्षा बोर्डले बुधबार एसइईको परीक्षाफल सार्वजनिक गरेको छ । जसमा सबैभन्दा बढी अर्थात ३.६ देखि ४ जीपीए ल्याउने विद्यार्थीको संख्या नौ हजार ६३३ रहेको बोर्डका सदस्य सचिव दुर्गाप्रसाद अर्यालले बताए । यो १.९४ प्रतिशत हो ।
त्यस्तै एसइईमा ३.२ देखि ३.६ जीपीए ल्याउने विद्यार्थी ४१ हजार ६२७ जना छन् । यो ८.४० प्रतिशत हो ।
यसैगरी २.८ देखि ३.२ जीपीए ल्याउने ६९ हजार नौ सय अर्थात १४.१ प्रतिशत, २.४ देखि २.८ जीपीए ल्याउने ९० हजार ५५८ अर्थात १८.३१ प्रतिशत छन् ।
सबैभन्दा बढी विद्यार्थीले २.० देखि २.४ जीपीए अंक ल्याएका छन् । यी विद्यार्थी संख्या एक लाख १२ हजार ७३३ रहेको छ । यो २२.७४ प्रतिशत हो ।
त्यस्तै १.६ देखि २.० जीपीए ल्याउने विद्यार्थी एक लाख ५९४ जना अर्थात २०.२९ प्रतिशत छन् । एसइईमा १.२ देखि १.६ जीपीए ल्याउने विद्यार्थी ४४ हजार ५८६ जना अर्थात ८.९९ प्रतिशत रहेको बोर्डले जनाएको छ ।
सबैभन्दा कम अर्थात ०.८ देखि १.२ सम्म ल्याउने विद्यार्थी तीन हजार २८० छन् । यो ०.६६ प्रतिशत हो ।
२०७८ को एसइईमा पाँच लाख १४ हजार ९७७ विद्यार्थी थिए । जसमध्ये २२ हजार ६४० विद्यार्थी अर्थात ४.५७ प्रतिशत विद्यार्थी अनुपस्थित रहेको सदस्य सचिव अर्यालले बताए ।
