काठमाडौँ । नेपाल भ्रमणमा रहेका चीनियाँ विदेशमन्त्री वाङ यी र नेकपा एमाले अध्यक्ष एवं पूर्वप्रधानमन्त्री केपी शर्मा ओलीबीच भेटवार्ता भएकोक छ । आज (आइतबार) बिहान होटल म्यारिएटमा भएको भेटवार्तामा विगतमा भएका बेल्ट एन्ड रोड (बीआरआई) अवधारणा अन्तर्गतका सहमति तथा सम्झौता कार्यान्वयन गर्ने विषयमा छलफल भएको जनाइएको छ ।
सो भेटमा नेपाल र चीनबीच विगतमा भएको बीआरआई सम्झौता कार्यान्वयन गर्नुपर्ने अध्यक्ष ओलीले वाङसँग आग्रह गरेको एमाले विदेश विभाग प्रमुख राजन भट्टराईले जानकारी दिए । भट्टराईका अनुसारबीआरआई परियोजनाभित्र पर्ने सडक, रेल, जलविद्युत लगायतका आयोजना छिटो अगाडि बढाउन सके समृद्ध नेपालको अवधारणामा सहयोग पुग्ने धारणा राखेका थिए ।
भेटमा अध्यक्ष ओलीले चीनसँग जोडिएका प्रमुख व्यापारिक नाका तातोपानी र केरुङबाट आयात–निर्यात सहज बनाउन समेत आग्रह गरेको जनाइएको छ ।
