खानेपानीमन्त्री उमाकान्त चौधरीले तोकिएको समयभित्र नै काठमाडौं उपत्यकामा मेलम्चीको खानेपानी आउने दाबी गरेका छन् । नेपाल खानेपानी संस्थानको ३३ औं वार्षिकोत्सवको अवसरमा आइतबार काठमाडौंमा आयोजित कार्यक्रममा मन्त्री चौधरीले यस्तो दाबी गरेका हुन् ।
मन्त्री चौधरीले तोकिएको अवधिभित्रै काठमाडौंबासीलाई उपलब्ध गराउने गरी सो खानेपानी आयोजनाको काममा तिव्रता दिइएको बताएका छन् । “प्रधानमन्त्री शेरबहादुर देउवाले पनि बाढी र पहिरोका कारण क्षति पुगेको मेलम्ची खानेपानी आवश्यक व्यवस्था मिलाएर काठमाडौंबासीलाई उपलब्ध गराउन राष्ट्रको नाममै सम्बोधन गरिसक्नु भएको छ,” उनले भने, “काठमाडौंबासीमा खानेपानीको चरम समस्या छ, उहाँहरुले खानेपानीको माग उठाइरख्नुभएको छ । तोकिएको समयमा नै उपत्यकासबासीले मेलम्चीको पानी पाउने छन् ।”
खानेपानी मन्त्रालयले आगामी चैतभित्र नै मेलम्चीको पानी उपत्यकामा आउने दाबी गरेको छ । मन्त्रालयका अनुसार फास्ट ट्रयाकबाट काम अगाडि बढेकाले अब चैतमा नै मेलम्ची खानेपानी आयोजना सुधारको काम सम्पन्न हुने छ ।
झन्डै दुई दशकको पर्खाइपछि उपत्यकामा आएको मेलम्ची खानेपानी आयोजनामा गत असार १ गते मेलम्ची खोलामा आएको बाढीले क्षति पुगेको थियो । आयोजनामा क्षति भएसँगै मेलम्चीको पानी कहिले आउँछ भन्ने कुरा अझै पनि अनिश्चित छ ।
मन्त्री चौधरीले खानेपानी महसुल निर्धारण आयोग केही दिनभित्रै गठन गर्ने घोषणा समेत गरेका छन् । केही वर्षदेखि सो आयोग रिक्त रहेकोले त्यसलाई पूर्णता दिन सरकारले प्रक्रिया अघि बढाइसकेको उनको भनाइ छ ।
मन्त्री चौधरीले सो आयोग अन्तर्गत रहेर सरकारले आम नागरिकलाई अझै सर्वसुलभ ढंगले खानेपानीको व्यवस्था गर्न लागेको पनि बताए । “संविधान र नेपाल सरकारको दृष्टिकोणले हेर्दा पनि न्यूनतम शुल्कमा आम ग्राहकले खानेपानीको सेवा पाओस् भन्ने मेरो चाहना छ,” मन्त्री चौधरीले थपे, “शुल्कको कुरामा हामीले शुल्क निर्धारण आयोग धेरै वर्षदेखि रिक्त छ। त्यो शुल्क निर्धारण आयोग गठन गर्नका लागि प्रक्रिया अगाडि बढाइसकेका छौं ।” मन्त्री चौधरीले ‘एक घर, एक धारा’ कार्यक्रमको सेवा विस्तार गर्न पनि सम्बन्धित निकायलाई सचेत गराए । हाल सो सेवा देशका विभिन्न २३ वटा सहरमा सञ्चालनमा आएको छ । त्यसलाई देशभर विस्तार गर्न मन्त्री चौधरीले नेपाल खानेपानी संस्थान, खानेपानी विभागलाई निर्देशन दिएका छन् ।
