नेष्डो समृद्ध लघुवित्त वित्तीय संस्थाले २०७८ फागुन ११ गते देखि आइपीओ निष्काशन गर्ने भएको छ । आइपीओ निष्काशन बन्द फागुन १५ गते बैंकिङ समय पश्चात हुनेछ ।
कम्पनीले प्रति कित्ता रु १०० रुपैयाँको दरले ८,२८,७५० कित्ता साधारण सेयर (आइपिओ) निष्काशन गर्ने भएको छ । जसमध्ये ०.५ प्रतिशत अर्थात् १२,७५० कित्ता कर्मचारीलाई, ५ प्रतिशत अर्थात् ४१,४३७ कित्ता सामुहिक लगानीकोषलाई सुरक्षित राखि बाँकी रहेको ७,७४,५६३ कित्ता सेयर सर्वसाधारणलाई निष्काशन गरिएको छ ।
इच्छुक आवेदकले न्यूनतम १० कित्ता र अधिकतम १००० कित्ताको लागि आवेदन दिन सक्नेछन् । लगानीकर्ताले मेरोसेयर तथा सि–आस्बा सदस्य बैंक तथा वित्तीय संस्था मार्फत आवेदन दिन सक्नेछन् ।
सेयर निष्काशन तथा विक्री प्रबन्धकमा ग्लोबल आइएमई क्यापिटल लिमिटेड रहेको छ ।
आइपीओ निष्काशन पछि कम्पनीको चुक्तापँजी २५ करोड ५० लाख पुग्नेछ । हाल यस लघुवित्तको चुक्तापुँजी १७ करोड २१ लाख रहेको छ ।
कम्पनी परिचयः
नेष्डो समृद्ध लघुवित्त वित्तीय संस्था कम्पनी ऐन, २०६३ बमोजिम मिति २०७४ चैत्र २८ गते कम्पनी रजिष्ट्रारको कार्यालयमा पब्लिक लिमिटेड कम्पनीको रुपमा दर्ता भएको हो । यस संस्था नेपाल राष्ट्र बैंकबाट इजाजतपत्र प्राप्त घ वर्गको वित्तीय संस्था हो । २०७५ माघ २९ गतेका इजाजत पत्र प्राप्त गरी २०७५ फाल्गुण २१ गतेदेखि लघुवित्त सेवा गर्दै आइरहेको छ ।
।
यस वित्तीय संस्थाका संस्थापकहरुमा विभिन्न बैंक तथा वित्तीय संस्था तथा बैंकिङ्ग क्षेत्र, सरकारी क्षेत्र, गैरसरकारी क्षेत्र, शैक्षिक क्षेत्र, कृषि, उद्योग तथा व्यापार क्षेत्र एवम् व्यवस्थापन क्षेत्रमा लामो समयदेखि दखल भएका प्रतिष्ठित व्यक्तिहरु रहेका छन् ।
यस लघुवित्तको आधारभूत शेयरधनीहरुमा राष्ट्रिय शैक्षिक तथा सामाजिक विकास संस्था, नेष्डो नेपाल,न्यूरोड, पर्वत,गण्डकी प्रदेश, प्रभु बैंक लिमिटेड र विश्व प्रकाश ठकुरी रहेको छ ।
केन्द्रिय कार्यालय
यस कम्पनीको रजिष्टर्ड कार्यालय, कुश्मा नगरपालिका, वडा नं. ६, न्यूरोड, गण्डकी प्रदेशमा रहेको छ ।
कार्यक्षेत्र र शाखाः
यस संस्थाले विभिन्न ३६ जिल्लाहरुमा ५६ वटा शाखा कार्यालयहरुबाट लघुवित्त सेवा प्रदान गर्दै आएको छ ।
पूँजी संरचना
अधिकृत पुँजी : ५० करोड
जारी पुँजी : १७ करोड २१ लख २५ हजार
चुक्तापुँजी : १७ करोड २१ लख २५ हजार
संस्थापक सेयर (६७.५०%) : १७ करोड २१ लख २५ हजार
सर्वसाधारण सेयर (३२.५०%) : ८ करोड २८ लख ७५ हजार
संचालक समिति
यस कम्पनीको संचालक समितिमा ७ जना सदस्य रहने व्यवस्था गरेको छ । संस्थापक समुहबाट ४ जना, सर्वसाधारण समुहबाट २ जना र स्वतन्त्र संचालक १ रहनेछ ।
संस्थाको अध्यक्षको रुपमा साबीत्री खत्री क्षेत्री लामिछाने कार्यरत छिन् । उनका अनुभव : २६ वर्ष सामाजिक अभियानमा संलग्न, १९ वर्ष लघु वित्तीय गैसस नेष्डो नेपाल र ५ वर्षदेखि नेष्डो समृद्ध लघुवित्त वित्तीय संस्था लि.मा सञ्चालकको अनुभव रहेको छ । अन्य संचालकहरुः
श्री विश्व प्रकाश प्रसाई प्रबन्ध सञ्चालक
श्री रत्न प्रसाद अधिकारी
श्री रेशम बहादुर खत्री
श्री प्रेम शर्मा पौडेल स्वतन्त्र संचालक
व्यवस्थापकः
श्री विश्व प्रकाश प्रसाई ठकुरी यस संस्थामा प्रबन्ध संचालकको रुपमा कार्यरत छन् । त्यसैगरी युधिष्ठिर भुषाल शर्मा वरिष्ठ प्रबन्धक र श्री नारायण प्रसाद प्रसाई प्रबन्धकको रुपमा कार्यरत छन् ।
वित्तीय विवरण
आइपीओ निष्काशन पछि कम्पनीको चुक्तापँजी २५ करोड ५० लाख पुग्नेछ । त्यसपछि पनि आगामी तीन वर्ष (२०८०/८१) सम्म पुँजी बृद्धि गर्दै लाने लक्ष्य राखेको छ । त्यसैले आगामी दिनमा यस कम्पनीले बोनस सेयरमा जोड दिन सक्छ । आइपिओ जारी पछि आर्थिक वर्ष २०७८/७९ मा करिब ३० प्रतिशतले पुँजी बृद्धि गर्ने लक्ष्य राखेको छ । त्यसैगरी आर्थिक वर्ष २०७९/८० मा ३५ प्रतिशत र आर्थिक वर्ष २०८०/८१ मा ४० प्रतिशतले पुँजी बृद्धि गर्ने प्रक्षेपण गरेको छ । जसको लागि कम्पनीले बोनस सेयर जारी गर्नु पर्ने हुन्छ।
आर्थिक वर्ष २०७७/७८ अनुसार चुक्तापूँजी १७ करोड २१ लख २५ हजार रहेको छ भने जगेडाकोषमा ४३ करोड ५१ लाख रहेको छ । त्यसै गरी कर्जा सापटी ३८ करोड ९२ लाख रहेको छ भने निक्षेप २ अर्ब २४ करोड रहेको छ । त्यसैगरी कर्जा परिचालन ४ अर्ब ८२ करोड गरेको छ । आगामी दिन यी सबै सुचक बृद्धि गर्दै जाने लक्ष्य राखेको छ ।
नाफा नोक्सान
यस कम्पनीले आर्थिक बर्ष २०७४/७५ देखि नै खुद नाफा कमाउन सफल रहेको छ । आगामी दिनमा पनि नाफा बृद्धी गर्दै जाने प्रक्षेपण गरेको छ । आव २०७७/७८ अनुसार कम्पनीको खुद नाफा १६ करोड ३३ लाख रहेको छ । यस अवधिमा प्रति सेयर आम्दानी रु ९४.८८ रहेको छ भने नेटवर्थ रु ३५२.२३ रहेको छ ।
आर्थिक वर्ष २०८०८१ सम्ममा प्रति सेयर आम्दानी रु १३२.८२ र नेटवर्थ रु ४०७.५९ पुग्ने प्रक्षेपण गरेको छ ।
क्रेडिट रेटिङ्ग
इक्रा नेपालले रेटिङ प्रदान गरको छ । जसको मतलब कम्पनीमा दायित्व वहन गर्ने क्षमतामा औसत जोखिम रहेका भन्ने बुझिन्छ ।
आईपीओबाट प्राप्त पुँजीको उपयोग
आइपिओ निष्काशनबाट प्राप्त रकमलाई पशुपालन तथा कृषि कर्जा, खुद्रा व्यापार र सेवा कर्जा र साना तथा घरेलु कर्जा परिचालनमा उपयोग गर्ने रहेकोछ ।
कति कित्ताको लागि आवेदन दिने ?
यस अघि निष्काशन गरिएको आइपीओलाई हेर्ने हो २५ लाख भन्दा बढी आवेदन परेको हुदाँ १०–२० कित्ता आवेदन दिन उचित हुनेछ ।
निष्काशन पछिको सुचिकरण रेन्ज
यस आईपिओ निष्काशन पछि नेप्सेमा २६०.८४ देखि ७८२.२३ सम्मको रेन्जमा सुचिकरण हुनेछ । सुचिकरण रेन्ज न्युनतम अडिटेड नेटवर्थ र अधिकतम नेटवर्थको ३ गुणा सम्म दिने नेप्सेमा नियम रहेको छ ।
