प्रतियोगितामा नेपालको यो दोस्रो विजय हो । नेपालले समूह चरणको सबै ४ खेल खेली ५ अंक बटुलेको छ । हङकङको ३ खेलमा ४ र बहराइनको ३ खेलमा १ अंक छ । हङकङ र बहराइन शुक्रबार खेल्दै छन् । हङकङले खेल जितेमा टोली नै दोस्रो चरणमा पुग्नेछ । अन्यथा नेपाल दोस्रो चरणमा पुग्नेछ ।

हङकङको खेल वर्षाले बिथोलेर जितको नतिजा आउन नसकेकामा टोलीको पनि ५ अंक हुनेछ । हङकङ नेट रन रेटमा नेपालभन्दा अगाडि रहे पनि प्रतियोगिताको नियामावलीअनुसार सर्वाधिक खेलमा विजय हात पार्ने टोली अगाडि जानेछ । नेपालले २ खेल जितेको छ भने हङकङले १ खेल मात्र जितेको छ । यस्तोमा हङकङले स्पष्ट विजय हात पार्न नसकेको खण्डमा नेपाल दोस्रो चरणमा पुग्नेछ ।

डबल राउन्ड रोबिनमा आयोजित प्रतियोगितामा सहभागी ९ टोलीलाई ३ समूहमा विभाजन गरिएको छ र प्रत्येक समूहका शीर्ष टोली दोस्रो चरणमा पुग्नेछन् । त्यसपछि ३ टोलीले एक आपसमा प्रतिस्पर्धा गरेपछि शीर्ष दुई टोली ट्वान्टी–२० विश्वकप छनोटमा पुग्नेछन् ।

थाइल्यान्डमा भइरहेको प्रतियोगिता वर्षाका कारण पुनः प्रभावित हुन पुग्यो । टस जितेर ब्याटिङ रोजेको बहराइनले बैंककस्थित टेर्डथाई क्रिकेट मैदानमा १२.४ ओभरमा ७६ रन बनाइरहेको समयमा वर्षाले लामो सयम खेल रोकिएको थियो । त्यसपछि डकवर्थ पद्धतिका आधारमा नेपाललाई ७ ओभरमा ५६ रनको लक्ष्य दिइएको थियो ।

इन्दुले ७ बलमै अविजित २४ रन बनाएपछि नेपालले ५.४ ओभरमै लक्ष्य पूरा गरेको थियो । पहिलो २ ओभरभित्र ८ रन बनाउँदा सम्झना खड्का (५), रुबी पोदार (१) र कविता कुँवर (०) लाई गुमाइसकेको अवस्थामा प्लेयर अफ द म्याच इन्दुले ४ चौका र १ छक्का प्रहार गरिन् । पूजा महतोले ११ बल खेलि २ चौकासहित १३ रन बनाइन् । पूर्वकप्तान रुविना क्षेत्री ५ बलमा ४ रन बनाई अविजित रहिन् । सम्झना पहिलो ओभरमै रनआउट भएकी थिइन् । बहराइनबाट बाँकी ३ विकेट पभित्रा शेट्टीले २ ओभरमा १० रन मात्र खर्चेर लिएकी थिइन् ।

यसअघि बहराइनबाट थाराङ्गा गजानायके १२, रसिका रोड्रिगो २९ बलमा ३ चौकासहित २४ र कप्तान दीपिका रसनगिका २७ बलमा २ चौका प्रहार गरी २३ रनमा आउट भएका थिए । तीनै खेलाडी रनआउट भएका थिए ।