हेटौंडा उपमहानगरको प्रमुख पद एकीकृत समाजवादीलाई दिने सहमति सत्तारूढ दलभित्र भएपछि मकवानपुर कांग्रेसका नेताहरूले असन्तुष्टि व्यक्त गरेका छन् । कांग्रेसका जिल्ला र नगर समितिले केन्द्रको निर्णय अमान्य हुने बताएका छन् ।
हेटौंडा–२ स्थित कांग्रेस पार्टी कार्यालयमा जिल्ला पदाधिकारी तथा पूर्वसभापतिहरूले बिहीबार पत्रकार सम्मेलन गरी केन्द्रीय नेतृत्वले सहमति पुनरावलोकन नगरे नमान्ने घोषणा गरेका हुन् । ‘केन्द्रले गरेको निर्णय पुनरावलोकन नगरी यथास्थितिमा निर्वाचनमा जाँदा गठबन्धनको आवश्यकता, औचित्य र मर्मविपरीत परिणाम आए हामी र आमकांग्रेस कार्यकर्ता जिम्मेवार र जवाफदेही नहुने स्पष्ट पार्छौं,’ उपसभापति आनन्द कठायतले भने । कांग्रेस नेताहरूले एकल उम्मेदवार खडा गर्ने चेतावनीसमेत दिएका छन् ।
कांग्रेस मकवानपुरका पूर्वसभापतिद्वय रामचन्द्र अर्याल माइकल र रघुरमण न्यौपानेले पनि गठबन्धन निर्णयको विरोध गरेका छन् । कांग्रेसका तर्फबाट हेटौंडाको प्रमुखमा पार्टी पूर्वसचिव आनन्दराम पराजुली र नेविसंघ पूर्वमहामन्त्री प्रभातकुमार दाहालको नाम चर्चामा थियो । एकीकृत समाजवादीका तर्फबाट जिल्ला अध्यक्ष श्रीधर पोखरेल र हेटौंडाकी उपप्रमुख मीना लामाको नाम सिफारिस भएको छ । माओवादी केन्द्रको भने दाबी थिएन । अघिल्लो स्थानीय तह निर्वाचनमा एमालेसँग ६ सय १५ मतान्तरले पराजित भएका कारण आफूले नेतृत्व पाउनुपर्ने दाबी कांग्रेस नेतृत्वको छ । यसै विषयलाई लिएर कांग्रेसका असन्तुष्ट युवा नेताले पार्टी कार्यालयमा तालाबन्दीसमेत गरेका थिए । ‘समाजवादी नयाँ दल हो, जनाधार कस्तो छ थाहा छैन, मतको हिसाब नगरी बाँडफाँट गर्दा प्रतिकूल नतिजा आउन सक्छ,’ कांग्रेस नगर सभापति उत्सव इटेनीले भने ।
