गोकर्णेश्वर नगरपालिका वडा नं ४ मा आँखा पाक्ने रोग सम्बन्धिको निशुल्क सिविर सम्पन्न भएको छ । शिविर आज विहान ८ बजेबाट अपरान्ह ३ बजे सम्म नगर अस्पतालमा संचालन भएको थियो ।
यस वारेमा नगर प्रमुख रिसालले बिरामीको संख्या अत्याधिक बढेकाले आँखा पाकेका बिरामीलाई मात्रै छुट्टै जाँच गर्ने र औषधी उपचारको व्यवस्था मिलाइएको जानकारी दिएका छन् ।
हरेक बर्खायाममा पानी परेर रोकिएपछि आँखा पाक्ने समस्या देखिन्छ । तर, यसवर्ष भने धेरै ठाउँमा प्रकोपको रुपमा समस्या देखिएको कारण गोकर्णेश्वर नगरपालिकामा पनि प्रभाव पार्ने सक्ने भएकाले रोग नियन्त्रण गर्नका लागि र नगरबासीको स्वास्थ्य अवस्थालाई ख्याल गर्न नगरपालिकाले निशुल्क आँखा जाँच तथा औषधी उपचार गर्ने भएको रिसालले बताएका छन् ।
आँखा पाक्ने समस्या भएका बिरामी अत्यधिक रुपमा अस्पताल आइरहेका बेला गोकर्णेश्वर नगरपालिकाले नेपालमै पहिलो पटक समुदायस्तरमा आँखा पाक्ने समस्या भएका विरामीहरुको निशुल्क उपचार गर्ने भएको छ । नगरपालिकाले आँखा सम्बन्धि रोग नियन्त्रण गर्ने उदेश्यले आँखा जाँच सम्बन्धि निशुल्क शिविर राखेर नियमित रुपमा उपचार गर्ने भएको हो ।
केही दिनयता देशका विभिन्न ठाउँमा आँखा पाक्ने रोग फैलिरहेको छ । चिकित्सकीय भाषामा आँखा पाक्ने रोगलाई ‘एडिनो भाइरस कन्जन्टिभाइटिस’ पनि भनिन्छ ।
देशभरका अस्पतालहरुको बहिंरग सेवामा आँखा सम्बन्धि बिरामीको चाप बढिरहेको छ । पछिल्ला दिनमा बिरामी तीन गुणासम्मले बढेका छन् ।
