अछामको पञ्चदेवल विनायक नगरपालिका–४ कालिकास्थान, कुच्चीका १७ वर्षीय विनोद शाहीको हत्यारा पत्ता लगाउन प्रहरीले कुकुर प्रयोग गरेको छ ।
प्रदेश प्रहरी कार्यालयले पठाएको सिआइबी टोलीले हत्या घटना अनुसन्धानमा तालिम प्राप्त कुकुरको सहायता लिएको हो । शनिबार पठाइएको सिआइबीको टोली आइतबार बिहान कुकुरसहित घटनास्थल पुगेको जनाएको छ ।
जेठ १७ गतेदेखि बेपत्ता भएका शाहीको शव शनिबार बिहान फेला पारेको थियो । अछाम पञ्चदेवल विनायक नगरपालिका–४ का १६ वर्षीय विनोद शाहीको शव बिहान कुच्ची भिरमा फेला परेको थियो।
त्यसलगत्तै एमाले कार्यकर्ताहरूले कांग्रेसका कार्यकर्ताले विनोदको हत्या गरेको आरोप लगाउँदै प्रहरीलाई घटनास्थल जान रोकेका थिए। सोहीक्रममा तनावग्रस्त बनेको विनायक क्षेत्रमा स्थिति नियन्त्रणमा लिन प्रहरीले हवाई फायर र अश्रु ग्याससमेत प्रहार गरेको थियो।
हिजो अबेर प्रदर्शनकारी एमाले कार्यकर्ता एवम् स्थानीयसँगको सहमतिपछि आज घटनास्थलमा तालिम प्राप्त कुकुरसहित सिआइबी र प्रहरी पुगेको अछामका प्रमुख जिल्ला अधिकारी विश्वराज मरासिनीले जानकारी दिए।
